hua yun ki raat Dhali nahin mere baam-e-dil pe utar gai

huā yuuñ ki raat Dhalī nahīñ mire bām-e-dil pe utar ga.ī

ruḳh-e-māhtāb kī aas meñ yuuñ hī baiThe baiThe guzar ga.ī

tire bāzuoñ pe Dhalī huī mire zer-e-lab thī rukī huī

vo jo ḳhvāb ḳhvāb sī raat thī use chhū ke yaad guzar ga.ī

tire dil ke daaġh tire nahīñ ye mirī amānat-e-zīst haiñ

ye rukī rukī sī hañsī tirī mire dasht-e-dil meñ bikhar ga.ī

tumheñ mujh se koī gila nahīñ mirī 'ādatoñ se ḳhafā nahīñ

kabhī DāñTnā kabhī rūThnā vo adā tumhārī kidhar ga.ī

hai nayā safar na.ī manzileñ mire yaar raah dikhā mujhe

ye siyāh raat kī tīrgī tirī ik nazar se sañvar ga.ī

kabhī bārishoñ meñ dhulī huī kabhī bādaloñ meñ ghulī huī

tirī chashm-e-tar mirī saañs meñ koī aah ban ke Thahar ga.ī

hua yun ki raat Dhali nahin mere baam-e-dil pe utar gai

ruKH-e-mahtab ki aas mein yun hi baiThe baiThe guzar gai

tere bazuon pe Dhali hui mere zer-e-lab thi ruki hui

wo jo KHwab KHwab si raat thi use chhu ke yaad guzar gai

tere dil ke dagh tere nahin ye meri amanat-e-zist hain

ye ruki ruki si hansi teri mere dasht-e-dil mein bikhar gai

tumhein mujh se koi gila nahin meri 'adaton se KHafa nahin

kabhi DanTna kabhi ruThna wo ada tumhaari kidhar gai

hai naya safar nai manzilen mere yar rah dikha mujhe

ye siyah raat ki tirgi teri ek nazar se sanwar gai

kabhi barishon mein dhuli hui kabhi baadalon mein ghuli hui

teri chashm-e-tar meri sans mein koi aah ban ke Thahar gai