humne mata-e-jaan ko tum par luTa diya

ham ne matā'-e-jān ko tum par luTā diyā

tum ne baḌe sukūn se ham ko bhulā diyā

logoñ ne ham se dard kī tafsīl pūchh lī

ham ne bhī shīsha thaam ke nīche girā diyā

chashmān-e-intizār ko us kā visāl ho

jis ke milan kī aas ne ham ko thakā diyā

ham ne bhī jaane vaale ko rokā nahīñ kabhī

jis ne kahā ki jaanā hai rasta banā diyā

mahfil 'urūj par thī ki maiñ ne ġhazal paḌhī

dād-e-suḳhan meñ logoñ ne dariyā bahā diyā

vo kahtā thā firāq meñ mar jā.ūñgā magar

maiñ ne bhī us ko hijr meñ jī kar dikhā diyā

'faizī' baḌe tapāk se milte rahe use

phir yuuñ huā ki yaar ne ham ko bhulā diyā

hum ne mata'-e-jaan ko tum par luTa diya

tum ne baDe sukun se hum ko bhula diya

logon ne hum se dard ki tafsil puchh li

hum ne bhi shisha tham ke niche gira diya

chashman-e-intizar ko us ka visal ho

jis ke milan ki aas ne hum ko thaka diya

hum ne bhi jaane wale ko roka nahin kabhi

jis ne kaha ki jaana hai rasta bana diya

mahfil 'uruj par thi ki main ne ghazal paDhi

dad-e-suKHan mein logon ne dariya baha diya

wo kahta tha firaq mein mar jaunga magar

main ne bhi us ko hijr mein ji kar dikha diya

'faizi' baDe tapak se milte rahe use

phir yun hua ki yar ne hum ko bhula diya