dhaDakti sham ki tanhai mein rulaun use

dhaḌaktī shaam kī tanhā.ī meñ rulā.ūñ use

jo mere bas meñ ho phir yaad bhī na aa.uuñ use

vo mil gayā ki judā.ī kā jis kī ranj na thā

judā jo ho gayā kis tarh bhuul jā.ūñ use

jise qarīb se jī bhar ke dekh saktā huuñ

ye kyā zarūr ki ab haath bhī lagā.ūñ use

vo paas ho to har ik baat par bigaḌ jā.ūñ

vo duur ho to baḌī chaah se bulā.ūñ use

vo dard ban ke mirī ruuh meñ utar jaa.e

maiñ abr ban ke kaḌī dhuup se bachā.ūñ use

nazar ke ā.ina-ḳhāne bhī ho gaye vīrāñ

ḳharāba-e-dil-e-tanhā meñ kyā basā.ūñ use

ye sochtā huuñ ki jis aag se maiñ raakh huā

kisī bahāne ab us aag meñ jalā.ūñ use

bahār ban ke hai ābād dil meñ jo 'mohsin'

ḳhizāñ kī rut kā kabhī aa.ina dikhā.ūñ use

dhaDakti sham ki tanhai mein rulaun use

jo mere bas mein ho phir yaad bhi na aaun use

wo mil gaya ki judai ka jis ki ranj na tha

juda jo ho gaya kis tarh bhul jaun use

jise qarib se ji bhar ke dekh sakta hun

ye kya zarur ki ab hath bhi lagaun use

wo pas ho to har ek baat par bigaD jaun

wo dur ho to baDi chah se bulaun use

wo dard ban ke meri ruh mein utar jae

main abr ban ke kaDi dhup se bachaun use

nazar ke aaina-KHane bhi ho gaye viran

KHaraba-e-dil-e-tanha mein kya basaun use

ye sochta hun ki jis aag se main rakh hua

kisi bahane ab us aag mein jalaun use

bahaar ban ke hai aabaad dil mein jo 'mohsin'

KHizan ki rut ka kabhi aaina dikhaun use