sitare jis ke ‘inan-gir hain wo zarra hun

sitāre jis ke ‘ināñ-gīr haiñ vo zarra huuñ

mujhe talāsh to kar maiñ bhī ek duniyā huuñ

mirā ġhubār pahuñchtā hai tā-had-e-imkāñ

maiñ dasht-e-shauq huuñ jaulāñ-gah-e-tamannā huuñ

ḳhushī ke phuul bhī aksar khilā.e haiñ lekin

jo naḳhl-e-ġham ko samar-var kare vo jhoñkā huuñ

fazā-e-jāñ hai ki hasrat-kade kā sannāTā

navā-e-tār-e-nafas se bhī kaañp uThtā huuñ

abhī to mere muġhannī ko bhī nahīñ mā'lūm

shikast-e-sāz kī jhankār huuñ ki naġhma huuñ

yahāñ bhī ho ga.e aġhyār anjuman-ārā

maiñ apne dil kī bharī mahfiloñ meñ tanhā huuñ

rah-e-vafā ke marāhil bhī kitne nāzuk the

maiñ apne aap se dāman bachā ke guzrā huuñ

nazar se saaf jhalakte haiñ dil ke vīrāne

vo haal hai ki ab ā.īne se bhī Dartā huuñ

vo jis ke saath thī ik nik.hatoñ kī shahzādī

us ek mauja-e-bād-e-ḳhizāñ se mahkā huuñ

jalā huuñ jab se chanāroñ kī aag meñ 'sādiq'

vatan meñ aa ke bhī kuchh ajnabī sā lagtā huuñ

sitare jis ke ‘inan-gir hain wo zarra hun

mujhe talash to kar main bhi ek duniya hun

mera ghubar pahunchta hai ta-had-e-imkan

main dasht-e-shauq hun jaulan-gah-e-tamanna hun

KHushi ke phul bhi aksar khilae hain lekin

jo naKHl-e-gham ko samar-war kare wo jhonka hun

faza-e-jaan hai ki hasrat-kade ka sannaTa

nawa-e-tar-e-nafas se bhi kanp uThta hun

abhi to mere mughanni ko bhi nahin ma'lum

shikast-e-saz ki jhankar hun ki naghma hun

yahan bhi ho gae aghyar anjuman-ara

main apne dil ki bhari mahfilon mein tanha hun

rah-e-wafa ke marahil bhi kitne nazuk the

main apne aap se daman bacha ke guzra hun

nazar se saf jhalakte hain dil ke virane

wo haal hai ki ab aaine se bhi Darta hun

wo jis ke sath thi ek nikhaton ki shahzadi

us ek mauja-e-baad-e-KHizan se mahka hun

jala hun jab se chanaron ki aag mein 'sadiq'

watan mein aa ke bhi kuchh ajnabi sa lagta hun