saat-e-umr guzarti rahi arzani mein

sā'at-e-'umr guzartī rahī arzānī meñ

jism yaksar thā namak aur basar paanī meñ

vo samajhtā hai ki barbād kiyā hai us ne

ham ki ābād hue jaate haiñ vīrānī meñ

lahreñ baḌh baḌh ke chalī aatī haiñ bosa lene

paaoñ rakkhā nahīñ maiñ ne abhī tuġhyānī meñ

sahl itnā bhī na jaano mujhe ai ham safarāñ

mushkileñ DhūñDhtā rahtā huuñ maiñ āsānī meñ

dil ke ā.īne meñ kis shaḳhs kā partau thā 'nadīm'

'umr jo saarī guzārī ga.ī hairānī meñ

sa'at-e-'umr guzarti rahi arzani mein

jism yaksar tha namak aur basar pani mein

wo samajhta hai ki barbaad kiya hai us ne

hum ki aabaad hue jate hain virani mein

lahren baDh baDh ke chali aati hain bosa lene

paon rakkha nahin main ne abhi tughyani mein

sahl itna bhi na jaano mujhe ai hum safaran

mushkilen DhunDhta rahta hun main aasani mein

dil ke aaine mein kis shaKHs ka partau tha 'nadim'

'umr jo sari guzari gai hairani mein