phule-phale hain be-sar-o-samaniyon mein hum

phūle-phale haiñ be-sar-o-sāmāniyoñ meñ ham

ik phuul ban ke mahke haiñ vīrāniyoñ meñ ham

us paikar-e-jamāl ke e'jāz-e-husn se

Duube haiñ ban ke aa.ina hairāniyoñ meñ ham

shāyad sukūñ se dil ko koī rabt bhī na thā

kyā mutma.in rahe haiñ pareshāniyoñ meñ ham

ubhre to apne aap meñ aa.e na 'umr bhar

Duube the husn-e-yār kī tuġhyāniyoñ meñ ham

ab to khaTak rahe haiñ jahāñ kī nigāh meñ

mash.hūr kis qadar the gul-afshāniyoñ meñ ham

charchā hamārī sāda-dilī kā hai shahr meñ

bad-nām kitne ho ga.e nādāniyoñ meñ ham

uftād-e-tab’ kā vahī 'ālam hai aaj bhī

barbād agarche ho ga.e man-māniyoñ meñ ham

saare jahāñ meñ koī ḳharīdār hī nahīñ

itne girāñ-bahā hue arzāniyoñ meñ ham

pās-e-vafā se lab pe shikāyat nahīñ 'razā'

kuchh kam nahīñ kisī se pashemāniyoñ meñ ham

phule-phale hain be-sar-o-samaniyon mein hum

ek phul ban ke mahke hain viraniyon mein hum

us paikar-e-jamal ke e'jaz-e-husn se

Dube hain ban ke aaina hairaniyon mein hum

shayad sukun se dil ko koi rabt bhi na tha

kya mutmain rahe hain pareshaniyon mein hum

ubhre to apne aap mein aae na 'umr bhar

Dube the husn-e-yar ki tughyaniyon mein hum

ab to khaTak rahe hain jahan ki nigah mein

mashhur kis qadar the gul-afshaniyon mein hum

charcha hamari sada-dili ka hai shahr mein

bad-nam kitne ho gae nadaniyon mein hum

uftad-e-tab’ ka wahi 'alam hai aaj bhi

barbaad agarche ho gae man-maniyon mein hum

sare jahan mein koi KHaridar hi nahin

itne giran-baha hue arzaniyon mein hum

pas-e-wafa se lab pe shikayat nahin 'raza'

kuchh kam nahin kisi se pashemaniyon mein hum