phir dil-o-jaan ki shikaston ke zamane aae

phir dil-o-jāñ kī shikastoñ ke zamāne aa.e

vo mujhe 'ahd-e-vafā yaad dilāne aa.e

daf'atan yuuñ hue ruḳhsat ki na dekhā muḌ kar

vo to jab aa.e qayāmat hī uThāne aa.e

log gulshan hī meñ dekhā kiye ḳhvāb-e-gulshan

ham to vīrāne ko gulzār banāne aa.e

naam baḌhte ga.e fehrist-e-shanāsā.ī meñ

kaam kuchh aa.e to bas dost purāne aa.e

chāra-gar aa.e to lekin ye ḳhabar hai kis ko

zaḳhm-e-dil siine ko yā dil ko dukhāne aa.e

vo bhī kyā log the saaqī se jo qasdan na mile

bāda-ḳhvāroñ se rah-o-rasm baḌhāne aa.e

'ishq kī apnī ravish husn kā apnā maslak

mujh ko pyaar aayā use hīle-bahāne aa.e

kitne muztar the magar jab bhī mile ham un se

kho ga.e aise ki lab par na fasāne aa.e

vo bhī haiñ log jinhoñ ne karam ik baar kiyā

aur phir roz hī ehsān jatāne aa.e

itnā khiñch kar bhī ye hasrat hai ki shāyad 'iqbāl'

ab dar-e-dil khule ab koī bulāne aa.e

phir dil-o-jaan ki shikaston ke zamane aae

wo mujhe 'ahd-e-wafa yaad dilane aae

daf'atan yun hue ruKHsat ki na dekha muD kar

wo to jab aae qayamat hi uThane aae

log gulshan hi mein dekha kiye KHwab-e-gulshan

hum to virane ko gulzar banane aae

nam baDhte gae fehrist-e-shanasai mein

kaam kuchh aae to bas dost purane aae

chaara-gar aae to lekin ye KHabar hai kis ko

zaKHm-e-dil sine ko ya dil ko dukhane aae

wo bhi kya log the saqi se jo qasdan na mile

baada-KHwaron se rah-o-rasm baDhane aae

'ishq ki apni rawish husn ka apna maslak

mujh ko pyar aaya use hile-bahane aae

kitne muztar the magar jab bhi mile hum un se

kho gae aise ki lab par na fasane aae

wo bhi hain log jinhon ne karam ek bar kiya

aur phir roz hi ehsan jatane aae

itna khinch kar bhi ye hasrat hai ki shayad 'iqbaal'

ab dar-e-dil khule ab koi bulane aae