kya hai is shahr pe bhi rahbaron ka ehsan

kyā hai is shahr pe bhī rāhbaroñ kā ehsān

rāste kyuuñ haiñ tire shahr ke itne vīrān

pyāsā dariyā to hameñ ḳhaak Dubotā lekin

le ke ham utre the dariyā meñ ḳhud apnā tūfāñ

ab jo ye fāsle kuchh kam bhī ba-zāhir kar leñ

baat pahlī sī to aane kā nahīñ hai imkān

ab tamannā ko mirī pūchhne aa.e ho ki jab

ḳhud-kushī kar chuke muddat huī saare armān

royā kartā thā maiñ har ik na.e dukh par pahroñ

dostoñ kā mujhe jab tak na huā thā 'irfān

itne dhuñdlā diye ġham ne mire chehre ke nuqūsh

aa.ina bhī hai mujhe dekh ke ab to hairān

chhoḌ dī paar utar jaane kī ḳhvāhish ham ne

thā na girdāb-e-tamannā se mafar kā imkān

kāġhazī phuul ki maslī huī kaliyāñ kuchh hoñ

ek muddat se hai suunā ye shikasta guldān

fasl jab boī thī ḳhvāboñ kī to mā'lūm na thā

aur ho jā.egī ye kisht-e-tamannā vīrān

raat ko sub.h banānā to thā dushvār bahut

haañ añdheroñ ko sahar kahnā bahut thā āsān

kho gayā bhiiḌ meñ sāyoñ kī 'na.īmī' yaaro

kaun DhūñDe kise mā'lūm hai us kī pahchān

kya hai is shahr pe bhi rahbaron ka ehsan

raste kyun hain tere shahr ke itne viran

pyasa dariya to hamein KHak Dubota lekin

le ke hum utre the dariya mein KHud apna tufan

ab jo ye fasle kuchh kam bhi ba-zahir kar len

baat pahli si to aane ka nahin hai imkan

ab tamanna ko meri puchhne aae ho ki jab

KHud-kushi kar chuke muddat hui sare arman

roya karta tha main har ek nae dukh par pahron

doston ka mujhe jab tak na hua tha 'irfan

itne dhundla diye gham ne mere chehre ke nuqush

aaina bhi hai mujhe dekh ke ab to hairan

chhoD di par utar jaane ki KHwahish hum ne

tha na girdab-e-tamanna se mafar ka imkan

kaghazi phul ki masli hui kaliyan kuchh hon

ek muddat se hai suna ye shikasta guldan

fasl jab boi thi KHwabon ki to ma'lum na tha

aur ho jaegi ye kisht-e-tamanna viran

raat ko subh banana to tha dushwar bahut

han andheron ko sahar kahna bahut tha aasan

kho gaya bhiD mein sayon ki 'naimi' yaro

kaun DhunDe kise ma'lum hai us ki pahchan