in KHarabon se tasawwur bhi kabhi guzra na tha

in ḳharāboñ se tasavvur bhī kabhī guzrā na thā

shahr-e-dil vīrāñ thā lekin itnā sannāTā na thā

zindagī mauj-e-sarāb-e-shauq thī dariyā na thā

kaun thā jo regzār-e-dahr meñ pyāsā na thā

kis qadar the ḳhush-numā mauj-e-talab ke zer-o-bam

jab qadam rakkhā to pahnā.ī kā andāza na thā

har rag-e-gul meñ sadā-e-nāla-e-zanjīr thī

rang ke pardoñ meñ zindānī koī dīvāna thā

zulmat-ābād-e-badan meñ ye havā kaisī chalī

sho'la-e-jāñ is se pahle yuuñ kabhī larzā na thā

āftāb-e-hijr kī garmī thī mahshar dar-kinār

din to din dāmān-e-shab meñ bhī kahīñ saaya na thā

apne apne dard meñ Duube hue the rāh-rau

ahl-e-ġham kā kārvāñ bhī kārvāñ lagtā na thā

jis gul-andām-e-tasavvur ke nikhāre the nuqūsh

maiñ ne us tasvīr-e-naġhma ko kabhī dekhā na thā

aarzū kī vus'ateñ us ko kahāñ tak le ga.iiñ

varna 'sādiq' ek musht-e-ḳhāk thā sahrā na thā

in KHarabon se tasawwur bhi kabhi guzra na tha

shahr-e-dil viran tha lekin itna sannaTa na tha

zindagi mauj-e-sarab-e-shauq thi dariya na tha

kaun tha jo regzar-e-dahr mein pyasa na tha

kis qadar the KHush-numa mauj-e-talab ke zer-o-bam

jab qadam rakkha to pahnai ka andaza na tha

har rag-e-gul mein sada-e-nala-e-zanjir thi

rang ke pardon mein zindani koi diwana tha

zulmat-abaad-e-badan mein ye hawa kaisi chali

sho'la-e-jaan is se pahle yun kabhi larza na tha

aaftab-e-hijr ki garmi thi mahshar dar-kinar

din to din daman-e-shab mein bhi kahin saya na tha

apne apne dard mein Dube hue the rah-rau

ahl-e-gham ka karwan bhi karwan lagta na tha

jis gul-andam-e-tasawwur ke nikhaare the nuqush

main ne us taswir-e-naghma ko kabhi dekha na tha

aarzu ki wus'aten us ko kahan tak le gain

warna 'sadiq' ek musht-e-KHak tha sahra na tha