ya to bikhrunga mukammal ya nikhar jaunga

yā to bikhrūñgā mukammal yā nikhar jā.ūñgā

maiñ agar chupke samundar meñ utar jā.ūñgā

kis ko mā'lūm thā ik hādsa hogā dil ko

maiñ ki bigḌā huā ik pal meñ sudhar jā.ūñgā

apnī tanhā.ī ke jangal meñ bhaTak kar āḳhir

ḳhud ko āvāz na dūñgā to kidhar jā.ūñgā

talḳh duniyā ke sañvarne kī umīdeñ le kar

ho ke māyūs maiñ duniyā se guzar jā.ūñgā

kaun kahtā hai ki maazī ko bhulāyā jaa.e

pichhlī aġhlāt se sīkhūñgā sudhar jā.ūñgā

apne zaḳhmoñ ko maiñ mash.hūr na hone dūñgā

lab pe muskān sajā.ūñgā jidhar jā.ūñgā

maiñ bhī nāzuk huuñ kisī phuul ke jaisā hī 'vaqī''

tez āñdhī jo chalegī to bikhar jā.ūñgā

ya to bikhrunga mukammal ya nikhar jaunga

main agar chupke samundar mein utar jaunga

kis ko ma'lum tha ek hadsa hoga dil ko

main ki bigDa hua ek pal mein sudhar jaunga

apni tanhai ke jangal mein bhaTak kar aaKHir

KHud ko aawaz na dunga to kidhar jaunga

talKH duniya ke sanwarne ki umiden le kar

ho ke mayus main duniya se guzar jaunga

kaun kahta hai ki mazi ko bhulaya jae

pichhli aghlat se sikhunga sudhar jaunga

apne zaKHmon ko main mashhur na hone dunga

lab pe muskan sajaunga jidhar jaunga

main bhi nazuk hun kisi phul ke jaisa hi 'waqi

tez aandhi jo chalegi to bikhar jaunga