ummid liye subh ki hum raat se nikle

ummīd liye sub.h kī ham raat se nikle

jugnū kī tarah ham bhī kisī haath se nikle

ḳhairāt dikhāve ke liye de to rahe ho

aisā na ho barkat tirī ḳhairāt se nikle

hālāt se laḌne kā irāda na ho jis kā

mumkin nahīñ vo gardish-e-hālāt se nikle

jab aane lagā maal to duniyā ne ye dekhā

auqāt meñ jo log the auqāt se nikle

bastī kī taraf aa gayā sailāb kā relā

be-ghar hue sab log makānāt se nikle

ik dast-e-hunar-mand ne yuuñ mujh ko sañvārā

jitne bhī the sab 'aib mirī zaat se nikle

ye saarā zamāna hameñ kahne lagā bāġhī

ham juuñ hī zamāne kī rivāyāt se nikle

aane lage phir aur hameñ tere ḳhayālāt

ham jab bhī kabhī tere ḳhayālāt se nikle

yuuñ us ne hameñ dekh ke pherī haiñ nigāheñ

āñkhoñ ke savālāt-o-javābāt se nikle

apnoñ kī gavāhī pe giraftār hue the

ġhairoñ kī zamānat pe havālāt se nikle

jab shahr-e-ḳhamoshāñ ko zabāñ mil ga.ī 'faisal'

tab jā ke parinde bhī mazāfāt se nikle

ummid liye subh ki hum raat se nikle

jugnu ki tarah hum bhi kisi hath se nikle

KHairaat dikhawe ke liye de to rahe ho

aisa na ho barkat teri KHairaat se nikle

haalat se laDne ka irada na ho jis ka

mumkin nahin wo gardish-e-haalat se nikle

jab aane laga mal to duniya ne ye dekha

auqat mein jo log the auqat se nikle

basti ki taraf aa gaya sailab ka rela

be-ghar hue sab log makanat se nikle

ek dast-e-hunar-mand ne yun mujh ko sanwara

jitne bhi the sab 'aib meri zat se nikle

ye sara zamana hamein kahne laga baghi

hum jun hi zamane ki riwayat se nikle

aane lage phir aur hamein tere KHayalat

hum jab bhi kabhi tere KHayalat se nikle

yun us ne hamein dekh ke pheri hain nigahen

aankhon ke sawalat-o-jawabaat se nikle

apnon ki gawahi pe giraftar hue the

ghairon ki zamanat pe hawalat se nikle

jab shahr-e-KHamoshan ko zaban mil gai 'faisal'

tab ja ke parinde bhi mazafat se nikle