sukhane baal hi koThe pe aa gae hote

sukhāne baal hī koThe pe aa ga.e hote

isī bahāne zarā muñh dikhā ga.e hote

tumheñ bhī vaqt kī raftār kā pata chaltā

nikal ke ghar se galī tak to aa ga.e hote

galā bhigo ke kahīñ aur sadā lagā letā

zarā faqīr ko paanī pilā ga.e hote

are ye Thiik huā hoñT sī liye ham ne

vagarna log tujhe kab kā pā ga.e hote

bhalā ho chāñd kā aate hī nuur pahuñchāyā

sitāre hote to āñkheñ churā ga.e hote

javān jismoñ ko ThanDā na kar sake lekin

havā ke jhoñke diyā to bujhā ga.e hote

sukhane baal hi koThe pe aa gae hote

isi bahane zara munh dikha gae hote

tumhein bhi waqt ki raftar ka pata chalta

nikal ke ghar se gali tak to aa gae hote

gala bhigo ke kahin aur sada laga leta

zara faqir ko pani pila gae hote

are ye Thik hua honT si liye hum ne

wagarna log tujhe kab ka pa gae hote

bhala ho chand ka aate hi nur pahunchaya

sitare hote to aankhen chura gae hote

jawan jismon ko ThanDa na kar sake lekin

hawa ke jhonke diya to bujha gae hote