labon pe muskurahaTen saja raha hai aadmi

laboñ pe muskurāhaTeñ sajā rahā hai aadmī

koī to zaḳhm hai jise chhupā rahā hai aadmī

paḌe phuvār dard kī to jal-tarang baj uTheñ

ba-chashm-e-nam bhī giit gungunā rahā hai aadmī

khiñchā ye jis bhī daar par vo sang-e-mīl ban ga.ī

azal se jāda-e-baqā dikhā rahā hai aadmī

jhukī huī kamar sahī ġham-o-alam ke bojh se

bulandiyoñ kī samt phir bhī jā rahā hai aadmī

na hādsoñ kī shab kaTī na zindagī kī pau phaTī

gajar umiid kā magar bajā rahā hai aadmī

zamīñ kī vus'atoñ ko dekh kar bahut qarīb se

ḳhalā meñ ab nasīb aazmā rahā hai aadmī

vahāñ vahāñ se āñdhiyoñ ne apne ruḳh badal liye

jahāñ jahāñ koī diyā jalā rahā hai aadmī

zamāna phir se aa rahā hai nafratoñ kī haar kā

ki aadmī ko phir gale lagā rahā hai aadmī

tajalliyāñ bikherne ko dūsroñ ke vāste

'qatīl' apne aap ko jalā rahā hai aadmī

labon pe muskurahaTen saja raha hai aadmi

koi to zaKHm hai jise chhupa raha hai aadmi

paDe phuwar dard ki to jal-tarang baj uThen

ba-chashm-e-nam bhi git gunguna raha hai aadmi

khincha ye jis bhi dar par wo sang-e-mil ban gai

azal se jada-e-baqa dikha raha hai aadmi

jhuki hui kamar sahi gham-o-alam ke bojh se

bulandiyon ki samt phir bhi ja raha hai aadmi

na hadson ki shab kaTi na zindagi ki pau phaTi

gajar umid ka magar baja raha hai aadmi

zamin ki wus'aton ko dekh kar bahut qarib se

KHala mein ab nasib aazma raha hai aadmi

wahan wahan se aandhiyon ne apne ruKH badal liye

jahan jahan koi diya jala raha hai aadmi

zamana phir se aa raha hai nafraton ki haar ka

ki aadmi ko phir gale laga raha hai aadmi

tajalliyan bikherne ko dusron ke waste

'qatil' apne aap ko jala raha hai aadmi