labon pe jhuT-muT ki hansi saja ke dekh lo

laboñ pe jhūT-mūT kī hañsī sajā ke dekh lo

sitāre chhup ga.e haiñ to diye jalā ke dekh lo

bahār kā nahīñ nishāñ agar chaman meñ hai ḳhizāñ

sajāo bazm-e-dostāñ fazā banā ke dekh lo

vo log jo bichhaḌ ga.e palaT ke phir na aa sake

to jaao un ko DhūñDh lo gale lagā ke dekh lo

bahut se rog vo bhī haiñ davā.eñ jin kā hal nahīñ

ḳhafā jo tum se ho ga.e unheñ manā ke dekh lo

suno jo dil pe bojh hai utaar do kisī tarah

ruke hue jo ashk haiñ unheñ bahā ke dekh lo

ḳhushī kī aarzū hai to anā kā ḳhol toḌ do

jo fāsle haiñ biich meñ unheñ miTā ke dekh lo

jo chain mil nahīñ rahā jo niiñd aa nahīñ rahī

baġhal meñ so rahā hai jo use jagā ke dekh lo

labon pe jhuT-muT ki hansi saja ke dekh lo

sitare chhup gae hain to diye jala ke dekh lo

bahaar ka nahin nishan agar chaman mein hai KHizan

sajao bazm-e-dostan faza bana ke dekh lo

wo log jo bichhaD gae palaT ke phir na aa sake

to jao un ko DhunDh lo gale laga ke dekh lo

bahut se rog wo bhi hain dawaen jin ka hal nahin

KHafa jo tum se ho gae unhen mana ke dekh lo

suno jo dil pe bojh hai utar do kisi tarah

ruke hue jo ashk hain unhen baha ke dekh lo

KHushi ki aarzu hai to ana ka KHol toD do

jo fasle hain bich mein unhen miTa ke dekh lo

jo chain mil nahin raha jo nind aa nahin rahi

baghal mein so raha hai jo use jaga ke dekh lo