tumhaara kya gaya gar thoDa sa qarar gaya

tumhārā kyā gayā gar thoḌā sā qarār gayā

ye dukh to merā hai ai dil mirā to yaar gayā

maiñ apne shor meñ uljhā huā thā aur ik shaḳhs

baḌī ḳhamoshī se aayā mujhe pukār gayā

ye kis ne merī taraf dekhā bhī nahīñ ik baar

ye kaun thā jo mire dar se be-qarār gayā

tamām nekiyāñ mil kar mujhe bachā na sakīñ

bas ik gunāh akelā hī mujh ko maar gayā

na rok pā.ūñgā dil ko ye jānte hue bhī

na lauT pā.egā jo us galī ke paar gayā

zarā ḳhabar bhī tujhe hai ki terī hijrat se

mujh aise kitne ġharīboñ kā rozgār gayā

yuuñ muskurā ke mujhe dekhnā zarūrī thā

rahā-sahā bhī mirā ḳhud se iḳhtiyār gayā

maiñ us ke 'ishq nahīñ hausle kā qaa.il huuñ

siyāh shab thā maiñ phir bhī mujhe guzār gayā

tumhaara kya gaya gar thoDa sa qarar gaya

ye dukh to mera hai ai dil mera to yar gaya

main apne shor mein uljha hua tha aur ek shaKHs

baDi KHamoshi se aaya mujhe pukar gaya

ye kis ne meri taraf dekha bhi nahin ek bar

ye kaun tha jo mere dar se be-qarar gaya

tamam nekiyan mil kar mujhe bacha na sakin

bas ek gunah akela hi mujh ko mar gaya

na rok paunga dil ko ye jaante hue bhi

na lauT paega jo us gali ke par gaya

zara KHabar bhi tujhe hai ki teri hijrat se

mujh aise kitne gharibon ka rozgar gaya

yun muskura ke mujhe dekhna zaruri tha

raha-saha bhi mera KHud se iKHtiyar gaya

main us ke 'ishq nahin hausle ka qail hun

siyah shab tha main phir bhi mujhe guzar gaya