tere milne ko bekal ho gae hain

tire milne ko bekal ho ga.e haiñ

magar ye log pāgal ho ga.e haiñ

bahāreñ le ke aa.e the jahāñ tum

vo ghar sunsān jañgal ho ga.e haiñ

yahāñ tak baḌh ga.e ālām-e-hastī

ki dil ke hausle shal ho ga.e haiñ

kahāñ tak taab laa.e nā-tavāñ dil

ki sadme ab musalsal ho ga.e haiñ

nigāh-e-yās ko niiñd aa rahī hai

mizha par ashk bojhal ho ga.e haiñ

unheñ sadiyoñ na bhūlegā zamāna

yahāñ jo hādse kal ho ga.e haiñ

jinheñ ham dekh kar jiite the 'nāsir'

vo log āñkhoñ se ojhal ho ga.e haiñ

tere milne ko bekal ho gae hain

magar ye log pagal ho gae hain

bahaaren le ke aae the jahan tum

wo ghar sunsan jangal ho gae hain

yahan tak baDh gae aalam-e-hasti

ki dil ke hausle shal ho gae hain

kahan tak tab lae na-tawan dil

ki sadme ab musalsal ho gae hain

nigah-e-yas ko nind aa rahi hai

mizha par ashk bojhal ho gae hain

unhen sadiyon na bhulega zamana

yahan jo hadse kal ho gae hain

jinhen hum dekh kar jite the 'nasir'

wo log aankhon se ojhal ho gae hain