dil ki diwar par lagi taswir

dil kī dīvār par lagī tasvīr

maiñ ne dekhī hai aap kī tasvīr

vo musavvir ke bas kā kaam nahīñ

jo banātī hai shā'irī tasvīr

apnā apnā vo haath lahrā.e

jis ne dekhī ho boltī tasvīr

baat hotī hai saarī bātin kī

mat dikhāo ye zāhirī tasvīr

aap apnī misāl hotī hai

an-kahī baat an-dikhī tasvīr

dard-o-ġham kā dimāġh rakhtī hai

nā-rasā.ī meñ bhīgtī tasvīr

tū hai yaktā mizāj meñ apne

tū musavvir kī āḳhrī tasvīr

tū banātā hai jism kī photo

maiñ banā.ūñgā ruuh kī tasvīr

phir tire hijr se mazā paayā

phir ḳhayāloñ meñ chuum lī tasvīr

kaise TuuTe udāsiyoñ kā tilism

kaise dekhūñ maiñ vasl kī tasvīr

marne vāloñ ko āgahī kab hai

jo rulātī hai āḳhrī tasvīr

dil ki diwar par lagi taswir

main ne dekhi hai aap ki taswir

wo musawwir ke bas ka kaam nahin

jo banati hai sha'iri taswir

apna apna wo hath lahrae

jis ne dekhi ho bolti taswir

baat hoti hai sari baatin ki

mat dikhao ye zahiri taswir

aap apni misal hoti hai

an-kahi baat an-dikhi taswir

dard-o-gham ka dimagh rakhti hai

na-rasai mein bhigti taswir

tu hai yakta mizaj mein apne

tu musawwir ki aaKHri taswir

tu banata hai jism ki photo

main banaunga ruh ki taswir

phir tere hijr se maza paya

phir KHayalon mein chum li taswir

kaise TuTe udasiyon ka tilism

kaise dekhun main wasl ki taswir

marne walon ko aagahi kab hai

jo rulati hai aaKHri taswir