dar to kya chiz hai diwar mein Dhal sakta hun

dar to kyā chiiz hai dīvār meñ Dhal saktā huuñ

maiñ mohabbat meñ faqat haath hī mal saktā huuñ

terī tasvīr ke lab to nahīñ khulne vaale

sar paTaḳhne ko maiñ dīvār badal saktā huuñ

merī mad.hosh-badan phūl-numā laḌkī sun

terā patthar huuñ aur eḌī se pighal saktā huuñ

kaun-sī baat tujhe mujh se ḳhafā kartī hai

yaar maiñ tere ishāroñ pe bhī chal saktā huuñ

tum mire saath raho aur bahut dhyān rahe

maiñ kisī vaqt kisī samt nikal saktā huuñ

merī ḳhvāhish use mā'lūm kahāñ hai 'kāshif'

vo samajhtī hai ki maiñ bosoñ se Tal saktā huuñ

dar to kya chiz hai diwar mein Dhal sakta hun

main mohabbat mein faqat hath hi mal sakta hun

teri taswir ke lab to nahin khulne wale

sar paTaKHne ko main diwar badal sakta hun

meri madhosh-badan phul-numa laDki sun

tera patthar hun aur eDi se pighal sakta hun

kaun-si baat tujhe mujh se KHafa karti hai

yar main tere ishaaron pe bhi chal sakta hun

tum mere sath raho aur bahut dhyan rahe

main kisi waqt kisi samt nikal sakta hun

meri KHwahish use ma'lum kahan hai 'kashif'

wo samajhti hai ki main boson se Tal sakta hun