apni pamali ki tashhir liye phirta hun

apnī pāmālī kī tash.hīr liye phirtā huuñ

ek hī shaḳhs kī tasvīr liye phirtā huuñ

der se aane kī 'ādat hai purānī mujh ko

haath par bāñdh ke tāḳhīr liye phirtā huuñ

kabhī fursat meñ vo ik ḳhvāb mujhe dekhnā hai

aañkh meñ jis kī maiñ tā'bīr liye phirtā huuñ

is liye duur bhī maiñ us se nahīñ jā paatā

pair meñ yaar kī zanjīr liye phirtā huuñ

hai azal se hī ḳhatā karnā mirā sheva huzūr

tabhī ā'māl meñ taqsīr liye phirtā huuñ

lab pe hai nām-e-'alī vird hamesha 'aḳhtar'

dil meñ maiñ āyat-e-tat.hīr liye phirtā huuñ

apni pamali ki tashhir liye phirta hun

ek hi shaKHs ki taswir liye phirta hun

der se aane ki 'adat hai purani mujh ko

hath par bandh ke taKHir liye phirta hun

kabhi fursat mein wo ek KHwab mujhe dekhna hai

aankh mein jis ki main ta'bir liye phirta hun

is liye dur bhi main us se nahin ja pata

pair mein yar ki zanjir liye phirta hun

hai azal se hi KHata karna mera shewa huzur

tabhi aa'mal mein taqsir liye phirta hun

lab pe hai nam-e-'ali wird hamesha 'aKHtar'

dil mein main aayat-e-tathir liye phirta hun