sadiyon se lahu mein tar raha hun

sadiyoñ se lahū meñ tar rahā huuñ

tasvīr meñ rang bhar rahā huuñ

bardāsht hī kaash mujh ko kar leñ

maiñ jin ko qubūl kar rahā huuñ

vo gāñTh jo uñgliyoñ se khul jaa.e

dāñtoñ se use katar rahā huuñ

bāhar se huuñ sābit-o-salāmat

andar se magar bikhar rahā huuñ

hai mujh se bhī vo baḌā adākār

jis ke liye svāñg bhar rahā huuñ

jo dard abhī uThā nahīñ hai

mahsūs use bhī kar rahā huuñ

naddī kī tarah chaḌhā thā 'rāshid'

dariyā kī tarah utar rahā huuñ

sadiyon se lahu mein tar raha hun

taswir mein rang bhar raha hun

bardasht hi kash mujh ko kar len

main jin ko qubul kar raha hun

wo ganTh jo ungliyon se khul jae

danton se use katar raha hun

bahar se hun sabit-o-salamat

andar se magar bikhar raha hun

hai mujh se bhi wo baDa adakar

jis ke liye swang bhar raha hun

jo dard abhi uTha nahin hai

mahsus use bhi kar raha hun

naddi ki tarah chaDha tha 'rashid'

dariya ki tarah utar raha hun