KHud-ba-KHud aise wo sheron mein utar aata hai

ḳhud-ba-ḳhud aise vo she'roñ meñ utar aatā hai

jaise mālik binā dastak diye ghar aatā hai

ye zarūrī nahīñ ho ghar kā pata to aa.e

us ko bin aa.e bhī aane kā hunar aatā hai

dil se uTh jaatī hai har shai kī mohabbat us dam

jab mohabbat ke koī zer-e-asar aatā hai

mujh ko mā'lūm nahīñ aap kī sūrat kyā hai

mujh ko har shaḳhs meñ vo shaḳhs nazar aatā hai

ye mohabbat kabhī tā-der nahīñ chhup saktī

ye vo Duubā hai jo kuchh duur ubhar aatā hai

kis kī ban saktī hai ḳhud socho bhalā is dil se

jo bhī kahtā huuñ ulaT us kā ye kar aatā hai

dost āsāñ nahīñ barsoñ kī riyāzat hai ki ab

ba-ḳhushī sog manāne kā hunar aatā hai

hai ye ehsās ġhalat raah nikal aayā huuñ

aise raste meñ magar moḌ kidhar aatā hai

aaj phirtā hai jo is shahr meñ hañstā-bastā

kal ke aḳhbār meñ vo ban ke ḳhabar aatā hai

lāziman maañ ne mirī yaad kiyā hogā mujhe

varna sahrā meñ bhalā sabz shajar aatā hai

apnī marzī yahāñ rakhtā nahīñ koī 'abrak'

uTh ke chal detā hai jab hukm-e-safar aatā hai

KHud-ba-KHud aise wo she'ron mein utar aata hai

jaise malik bina dastak diye ghar aata hai

ye zaruri nahin ho ghar ka pata to aae

us ko bin aae bhi aane ka hunar aata hai

dil se uTh jati hai har shai ki mohabbat us dam

jab mohabbat ke koi zer-e-asar aata hai

mujh ko ma'lum nahin aap ki surat kya hai

mujh ko har shaKHs mein wo shaKHs nazar aata hai

ye mohabbat kabhi ta-der nahin chhup sakti

ye wo Duba hai jo kuchh dur ubhar aata hai

kis ki ban sakti hai KHud socho bhala is dil se

jo bhi kahta hun ulaT us ka ye kar aata hai

dost aasan nahin barson ki riyazat hai ki ab

ba-KHushi sog manane ka hunar aata hai

hai ye ehsas ghalat rah nikal aaya hun

aise raste mein magar moD kidhar aata hai

aaj phirta hai jo is shahr mein hansta-basta

kal ke aKHbar mein wo ban ke KHabar aata hai

laziman man ne meri yaad kiya hoga mujhe

warna sahra mein bhala sabz shajar aata hai

apni marzi yahan rakhta nahin koi 'abrak'

uTh ke chal deta hai jab hukm-e-safar aata hai