halla har nam pe jab bol diya illallah

hallā har naam pe jab bol diyā illallāh

phir ḳhudā.ī hai na hai koī ḳhudā illallāh

mere inkār se īmān kī rāheñ raushan

koī mā'būd na duniyā meñ bachā illallāh

husn bātil hai tirā aañkh munāfiq merī

vahm hī vahm hai sab nāz-o-adā illallāh

kākuleñ khol ke rakh zulf ko zahmat hī na de

maiñ to har qaid se āzād huā illallāh

duur se kis ne kiyā nā'ra-e-tauhīd buland

parda-e-gosh se uThtī hai sadā illallāh

roz-o-shab bajtā hai sāzīna-e-ajrām-e-falak

mil ke gaate haiñ sadā arz-o-samā illallāh

lā-ilah paḌhtā huuñ jab sāmne us ke 'sayyad'

kitne andāz se kahtā hai ba-jā illallāh

halla har nam pe jab bol diya illallah

phir KHudai hai na hai koi KHuda illallah

mere inkar se iman ki rahen raushan

koi ma'bud na duniya mein bacha illallah

husn baatil hai tera aankh munafiq meri

wahm hi wahm hai sab naz-o-ada illallah

kakulen khol ke rakh zulf ko zahmat hi na de

main to har qaid se aazad hua illallah

dur se kis ne kiya na'ra-e-tauhid buland

parda-e-gosh se uThti hai sada illallah

roz-o-shab bajta hai sazina-e-ajram-e-falak

mil ke gate hain sada arz-o-sama illallah

la-ilah paDhta hun jab samne us ke 'sayyad'

kitne andaz se kahta hai ba-ja illallah