dariya o koh o dasht o hawa arz aur sama

dariyā o koh o dasht o havā arz aur samā

dekhā to har makāñ meñ vahī hai rahā samā

hai kaun sī vo chashm nahīñ jis meñ us kā nuur

hai kaun sā vo dil ki nahīñ jis meñ us kī jā

qumrī usī kī yaad meñ kū-kū kare hai yaar

bulbul usī ke shauq meñ kartī hai chahchahā

muflis kahīñ ġharīb tavañgar kahīñ ġhanī

aajiz kahīñ nibal kahīñ sultāñ kahīñ gadā

bahrūp sā banā ke har ik jā vo aan aan

kis kis tarah ke ruup badaltā hai vāh-vā

mulk-e-razā meñ kar ke tavakkul kī jins ko

baiTheñ haiñ sab isī kī dukāneñ lagā lagā

sab kā isī dukān se jaarī hai kārobār

letā hai koī husn koī dil hai bechtā

dekhā jo ḳhuub ġhaur se ham ne to yaañ 'nazīr'

bāzār-e-mustafā hai ḳharīdār hai ḳhudā

dariya o koh o dasht o hawa arz aur sama

dekha to har makan mein wahi hai raha sama

hai kaun si wo chashm nahin jis mein us ka nur

hai kaun sa wo dil ki nahin jis mein us ki ja

qumri usi ki yaad mein ku-ku kare hai yar

bulbul usi ke shauq mein karti hai chahchaha

muflis kahin gharib tawangar kahin ghani

aajiz kahin nibal kahin sultan kahin gada

bahrup sa bana ke har ek ja wo aan aan

kis kis tarah ke rup badalta hai wah-wa

mulk-e-raza mein kar ke tawakkul ki jins ko

baiThen hain sab isi ki dukanen laga laga

sab ka isi dukan se jari hai karobar

leta hai koi husn koi dil hai bechta

dekha jo KHub ghaur se hum ne to yan 'nazir'

bazar-e-mustafa hai KHaridar hai KHuda