rabt-e-niyaz-o-naz ajab kaam aa gaya

rabt-e-niyāz-o-nāz 'ajab kaam aa gayā

vo mujh pe chhā gaye maiñ zamāne pe chhā gayā

jalva to tuur par vo bahut kam dikhā gayā

albatta ġhash kisī ko ziyādā hī aa gayā

jannat se ik ḳhatā pe nikālā gayā jise

kar ke vahī ḳhatā tirī duniyā basā gayā

kahtā hameñ burā to na laḌte raqīb se

tum ko burā kahā to na ham se rahā gayā

mansūr meñ jo haq thā huā thā vahī 'ayāñ

andhā zamāna daar pe haq ko chaḌhā gayā

shak hai ki chāhtā huuñ kisī aur ko bhī maiñ

ilzām ik nayā vo mire sar lagā gayā

gar us ke dil meñ chor nahīñ thā to kis liye

mahfil meñ ham ko dekh ke nazreñ churā gayā

masjid meñ ek baat to rindoñ meñ ek baat

vā'iz gayā jahāñ bhī nayā gul khilā gayā

majma' meñ saare mere mohalle ke log the

vo koī aur thā jo mirā ghar jalā gayā

aatā nahīñ du'ā meñ asar is ḳhayāl se

tā'na na de falak ki vo pastī meñ aa gayā

bandoñ se qarz māñgā jab allāh ne 'adīl'

itnā diyā kisī ne ki ghar hī luTā gayā

rabt-e-niyaz-o-naz 'ajab kaam aa gaya

wo mujh pe chha gaye main zamane pe chha gaya

jalwa to tur par wo bahut kam dikha gaya

albatta ghash kisi ko ziyaada hi aa gaya

jannat se ek KHata pe nikala gaya jise

kar ke wahi KHata teri duniya basa gaya

kahta hamein bura to na laDte raqib se

tum ko bura kaha to na hum se raha gaya

mansur mein jo haq tha hua tha wahi 'ayan

andha zamana dar pe haq ko chaDha gaya

shak hai ki chahta hun kisi aur ko bhi main

ilzam ek naya wo mere sar laga gaya

gar us ke dil mein chor nahin tha to kis liye

mahfil mein hum ko dekh ke nazren chura gaya

masjid mein ek baat to rindon mein ek baat

wa'iz gaya jahan bhi naya gul khila gaya

majma' mein sare mere mohalle ke log the

wo koi aur tha jo mera ghar jala gaya

aata nahin du'a mein asar is KHayal se

ta'na na de falak ki wo pasti mein aa gaya

bandon se qarz manga jab allah ne 'adil'

itna diya kisi ne ki ghar hi luTa gaya