parkon mein sham ko har ek sahar-paikar laga

pārkoñ meñ shaam ko har ik sahar-paikar lagā

sub.h ko vo hī magar rātoñ kā paiġhambar lagā

ḳhuun ke chhīñToñ se aaj un kā bhī dāman tar lagā

aur ye ilzām un par ghar ke hī andar lagā

kho na jaa.e tū kahīñ parchhā.iyoñ kī bhiiḌ meñ

ehtiyātan koī taḳhtī naam kī sar par lagā

maiñ rukā hī thā ki le luuñ saa.e meñ dam bhar ko saañs

ek patthar daf'atan sar par mire aa kar lagā

gāliyoñ kī tarbiyat-gah sirf bachchoñ ke liye

ek aisā board bhī ab bāb-e-masjid par lagā

dekhnā TuuTe hue dil kī nazākat kā mizāj

phuul jo us ne diyā vo bhī mujhe patthar lagā

'umr-bhar bhaTkā huuñ itnā hādsoñ ke dasht meñ

mil gayā jab koī rahzan bhī mujhe rahbar lagā

kuchh nahīñ is shahr meñ chhoTe baḌe kā imtiyāz

jis lahad par chāhe apne naam kā patthar lagā

gard-e-nā-karda-gunāhī se thā har chehra aTā

ham ne bhī dekhā vo mela jo sar-e-mahshar lagā

apnā chehra dekh kar kar le na koī ḳhud-kushī

ye saḌak hai aa.ine ko ghar ke hī andar lagā

siine meñ patthar bhī ho saktā hai kaise jānte

chhū ke dekhā thā to vo phūloñ se nāzuk-tar lagā

maiñ ne to dushman pe pheñkā thā bahut chhup kar magar

lauT kar mere hī jaane kaise vo patthar lagā

bā'd-e-muddat jab dayār-e-ġham se aa.e lauT kar

apnā ghar bhī to 'na.īmī' dūsre kā ghar lagā

parkon mein sham ko har ek sahar-paikar laga

subh ko wo hi magar raaton ka paighambar laga

KHun ke chhinTon se aaj un ka bhi daman tar laga

aur ye ilzam un par ghar ke hi andar laga

kho na jae tu kahin parchhaiyon ki bhiD mein

ehtiyatan koi taKHti nam ki sar par laga

main ruka hi tha ki le lun sae mein dam bhar ko sans

ek patthar daf'atan sar par mere aa kar laga

galiyon ki tarbiyat-gah sirf bachchon ke liye

ek aisa board bhi ab bab-e-masjid par laga

dekhna TuTe hue dil ki nazakat ka mizaj

phul jo us ne diya wo bhi mujhe patthar laga

'umr-bhar bhaTka hun itna hadson ke dasht mein

mil gaya jab koi rahzan bhi mujhe rahbar laga

kuchh nahin is shahr mein chhoTe baDe ka imtiyaz

jis lahad par chahe apne nam ka patthar laga

gard-e-na-karda-gunahi se tha har chehra aTa

hum ne bhi dekha wo mela jo sar-e-mahshar laga

apna chehra dekh kar kar le na koi KHud-kushi

ye saDak hai aaine ko ghar ke hi andar laga

sine mein patthar bhi ho sakta hai kaise jaante

chhu ke dekha tha to wo phulon se nazuk-tar laga

main ne to dushman pe phenka tha bahut chhup kar magar

lauT kar mere hi jaane kaise wo patthar laga

ba'd-e-muddat jab dayar-e-gham se aae lauT kar

apna ghar bhi to 'naimi' dusre ka ghar laga