be-wajh log aae hain pani to hai nahin

be-vaj.h log aa.e haiñ paanī to hai nahīñ

vaise bhī un ko aag bujhānī to hai nahīñ

jis din ubaal aa gayā phir ḳhairiyat kahāñ

ye ḳhuun hai hamārā ye paanī to hai nahīñ

bekār aap baiThe haiñ ghere hue mujhe

ab mere paas koī kahānī to hai nahīñ

kyā guftugū karūñ maiñ yahāñ ahl-e-'ilm se

lahje meñ mere itnī ravānī to hai nahīñ

samjhe na jo ishāre ko thoḌā bahut mire

kahne ko ab vo itnī divānī to hai nahīñ

album se apne dil kī haTāte ho kis liye

tasvīr merī itnī purānī to hai nahīñ

tere baġhair sair ko jā.ūñ maiñ kis liye

tere baġhair shaam suhānī to hai nahīñ

ik be-vafā se kar ke mohabbat fuzūl meñ

dar dar kī mujh ko ḳhaak uḌānī to hai nahīñ

nashsha hamāre sar pe thā jis kā chaḌhā huā

ai yaar ham meñ ab vo javānī to hai nahīñ

bachche jise sañbhāl ke 'najmī' na rakh sake

dastār merī itnī purānī to hai nahīñ

be-wajh log aae hain pani to hai nahin

waise bhi un ko aag bujhani to hai nahin

jis din ubaal aa gaya phir KHairiyat kahan

ye KHun hai hamara ye pani to hai nahin

bekar aap baiThe hain ghere hue mujhe

ab mere pas koi kahani to hai nahin

kya guftugu karun main yahan ahl-e-'ilm se

lahje mein mere itni rawani to hai nahin

samjhe na jo ishaare ko thoDa bahut mere

kahne ko ab wo itni diwani to hai nahin

album se apne dil ki haTate ho kis liye

taswir meri itni purani to hai nahin

tere baghair sair ko jaun main kis liye

tere baghair sham suhani to hai nahin

ek be-wafa se kar ke mohabbat fuzul mein

dar dar ki mujh ko KHak uDani to hai nahin

nashsha hamare sar pe tha jis ka chaDha hua

ai yar hum mein ab wo jawani to hai nahin

bachche jise sanbhaal ke 'najmi' na rakh sake

dastar meri itni purani to hai nahin