ab to kuchh aur hi ejaz dikhaya jae

ab to kuchh aur hī e'jāz dikhāyā jaa.e

shaam ke baa'd bhī sūraj na bujhāyā jaa.e

gul haiñ kam-yāb agar ḳhuun to arzāñ hogā

kisī 'unvāñ to koī rang jamāyā jaa.e

aaj ke daur meñ insāf ke mā'nī ye haiñ

ruuh 'mar jaa.e magar jism bachāyā jaa.e

kaun shāhoñ ko gadāoñ se alag pahchāne

ab to ḳhil'at meñ bhī paivand lagāyā jaa.e

aaj anal-haq se baḌī koī haqīqat hī nahīñ

momino daar pe kis kis ko chaḌhāyā jaa.e

na.e insāñ se ta'āruf jo huā to bolā

maiñ huuñ suqrāt mujhe zahr pilāyā jaa.e

maut se kis ko mafar hai magar insānoñ ko

pahle jiine kā salīqa to sikhāyā jaa.e

yuuñ bhī ho saktī hai āvezish-e-ḳhair-o-shar ḳhatm

phir se shaitāñ ko ‘azāzīl banāyā jaa.e

koī bhī tere sivā monis-e-tanhā.ī na thā

ik ḳhudā thā magar us ko bhī chhupāyā jaa.e

maiñ mohabbat kā pujārī huuñ 'aqīdoñ kā nahīñ

in butoñ ko mire raste se haTāyā jaa.e

mujh ko dā'vā to hai kāñToñ ko bhī rauñd aane kā

aur phūloñ se bhī dāman na chhuḌāyā jaa.e

kis ne māñgī thī mire tark-e-tajassus kī du'ā

mere dushman ko mire sāmne laayā jaa.e

maiñ qayāmat kā to munkir nahīñ lekin vā'iz

mujh se insāñ ko tamāshā na banāyā jaa.e

hukm hai sach bhī qarīne se kahā jaa.e 'nadīm'

zaḳhm ko zaḳhm nahīñ phuul batāyā jaa.e

ab to kuchh aur hi e'jaz dikhaya jae

sham ke ba'd bhi suraj na bujhaya jae

gul hain kam-yab agar KHun to arzan hoga

kisi 'unwan to koi rang jamaya jae

aaj ke daur mein insaf ke ma'ni ye hain

ruh 'mar jae magar jism bachaya jae

kaun shahon ko gadaon se alag pahchane

ab to KHil'at mein bhi paiwand lagaya jae

aaj anal-haq se baDi koi haqiqat hi nahin

momino dar pe kis kis ko chaDhaya jae

nae insan se ta'aruf jo hua to bola

main hun suqraat mujhe zahr pilaya jae

maut se kis ko mafar hai magar insanon ko

pahle jine ka saliqa to sikhaya jae

yun bhi ho sakti hai aawezish-e-KHair-o-shar KHatm

phir se shaitan ko ‘azazil banaya jae

koi bhi tere siwa monis-e-tanhai na tha

ek KHuda tha magar us ko bhi chhupaya jae

main mohabbat ka pujari hun 'aqidon ka nahin

in buton ko mere raste se haTaya jae

mujh ko da'wa to hai kanTon ko bhi raund aane ka

aur phulon se bhi daman na chhuDaya jae

kis ne mangi thi mere tark-e-tajassus ki du'a

mere dushman ko mere samne laya jae

main qayamat ka to munkir nahin lekin wa'iz

mujh se insan ko tamasha na banaya jae

hukm hai sach bhi qarine se kaha jae 'nadim'

zaKHm ko zaKHm nahin phul bataya jae