tu hamein jab kabhi yaad aae

tū hameñ jab kabhī yaad aa.e

piit kī chāñdnī yaad aa.e

bhūlnā chāhā ek āshnā ko

saiñkaḌoñ ajnabī yaad aa.e

pyaar zanjīr-e-jāñ ban gayā hai

dard kī har kaḌī yaad aa.e

dekh aa.e haiñ sab kū-e-qātil

ab kise zindagī yaad aa.e

kyā huiiñ jugnuoñ sī vo āñkheñ

raat barsāt kī yaad aa.e

zikr jab koī chheḌe chaman kā

pankhuḌī pankhuḌī yaad aa.e

shām-e-ġhurbat kā ye ghup añdherā

shakl vo chāñd sī yaad aa.e

jab karūñ maiñ zamāne kā shikva

bhuul apnī koī yaad aa.e

dekh kar mūslā-dhār bārish

apnī tishna-labī yaad aa.e

ġham to bichhḌe huoñ kā hai lekin

ik nayā shaḳhs bhī yaad aa.e

thā 'qatīl' āḳhrī dost apnā

vo bhalā aadmī yaad aa.e

tu hamein jab kabhi yaad aae

pit ki chandni yaad aae

bhulna chaha ek aashna ko

sainkaDon ajnabi yaad aae

pyar zanjir-e-jaan ban gaya hai

dard ki har kaDi yaad aae

dekh aae hain sab ku-e-qatil

ab kise zindagi yaad aae

kya huin jugnuon si wo aankhen

raat barsat ki yaad aae

zikr jab koi chheDe chaman ka

pankhuDi pankhuDi yaad aae

sham-e-ghurbat ka ye ghup andhera

shakl wo chand si yaad aae

jab karun main zamane ka shikwa

bhul apni koi yaad aae

dekh kar musla-dhaar barish

apni tishna-labi yaad aae

gham to bichhDe huon ka hai lekin

ek naya shaKHs bhi yaad aae

tha 'qatil' aaKHri dost apna

wo bhala aadmi yaad aae