شام آتے ہی غم نکلتا ہے

شام آتے ہی غم نکلتا ہے

ساتھ سورج کے دل بھی ڈھلتا ہے

موت آتی ہے خوش نصیبوں کو

میرے جیسوں کو غم نگلتا ہے

چھوٹے بچوں سا ہے مرا دل بھی

کچھ نہیں کہتا بس مچلتا ہے

کیسے بیتے گی زندگی تم بن

سوچنے پر ہی دم نکلتا ہے

ہار جاتی ہیں دھڑکنیں اکثر

عشق سانسوں سے تیز چلتا ہے

مسکراتا ہے جب کوئی اپنا

میرے سینے کا زخم جلتا ہے

تجھ کو غیروں کے ساتھ دیکھوں تو

زخم بھرنے کے بعد جلتا ہے

مٹ ہی جائے گا غم بھی سینے کا

عمر بھر کون ساتھ چلتا ہے