mahakti chandni hai aur main hun

mahaktī chāñdnī hai aur maiñ huuñ

'urūs-e-zindagī hai aur maiñ huuñ

mirī āñkheñ haiñ aur sūrat tumhārī

hasīñ manzar-kashī hai aur maiñ huuñ

tijārat kar rahā huuñ āñsuoñ kī

'ajab saudā-garī hai aur maiñ huuñ

maiñ gaatā jā rahā huuñ apnī dhun meñ

mirī dīvāngī hai aur maiñ huuñ

navāzā hai mujhe ranj-o-alam se

'ināyat aap kī hai aur maiñ huuñ

mirā zaḳhm-e-jigar hai aur tū hai

tirī chāragarī hai aur maiñ huuñ

guzartā jā rahā huuñ hādsoñ se

irāda āhanī hai aur maiñ huuñ

nahīñ tanhā maiñ rāh-e-zindagī meñ

kisī kī yaad bhī hai aur maiñ huuñ

dikhā.ī kuchh nahīñ detā ki kyā hai

balā kī tīrgī hai aur maiñ huuñ

yahāñ 'muztar' nahīñ koī kisī kā

zamāna matlabī hai aur maiñ huuñ

mahakti chandni hai aur main hun

'urus-e-zindagi hai aur main hun

meri aankhen hain aur surat tumhaari

hasin manzar-kashi hai aur main hun

tijarat kar raha hun aansuon ki

'ajab sauda-gari hai aur main hun

main gata ja raha hun apni dhun mein

meri diwangi hai aur main hun

nawaza hai mujhe ranj-o-alam se

'inayat aap ki hai aur main hun

mera zaKHm-e-jigar hai aur tu hai

teri chaaragari hai aur main hun

guzarta ja raha hun hadson se

irada aahani hai aur main hun

nahin tanha main rah-e-zindagi mein

kisi ki yaad bhi hai aur main hun

dikhai kuchh nahin deta ki kya hai

bala ki tirgi hai aur main hun

yahan 'muztar' nahin koi kisi ka

zamana matlabi hai aur main hun