zindagi ke ye sawalat kahan the pahle

zindagī ke ye savālāt kahāñ the pahle

itne uljhe hue hālāt kahāñ the pahle

ab to iz.hār-e-tamannā se bhī jī Dartā hai

itne sahme hue jazbāt kahāñ the pahle

husn aur 'ishq hue kitne muqaddas ham se

itne pākīza ḳhayālāt kahāñ the pahle

aaj har gaam pe jalte haiñ charāġh-e-manzil

rah-guzar meñ ye maqāmāt kahāñ the pahle

ham ko badle hue hālāt ne baḳhshā ye sharaf

aap pāband-e-mulāqāt kahāñ the pahle

ham ne maiḳhāne meñ saaqī kā bharam khol diyā

ham se rindān-e-ḳharābāt kahāñ the pahle

merī nazroñ ke ye andāz-e-nazar haiñ 'muztar'

har nazar meñ ye payāmāt kahāñ the pahle

zindagi ke ye sawalat kahan the pahle

itne uljhe hue haalat kahan the pahle

ab to izhaar-e-tamanna se bhi ji Darta hai

itne sahme hue jazbaat kahan the pahle

husn aur 'ishq hue kitne muqaddas hum se

itne pakiza KHayalat kahan the pahle

aaj har gam pe jalte hain charagh-e-manzil

rah-guzar mein ye maqamat kahan the pahle

hum ko badle hue haalat ne baKHsha ye sharaf

aap paband-e-mulaqat kahan the pahle

hum ne maiKHane mein saqi ka bharam khol diya

hum se rindan-e-KHarabaat kahan the pahle

meri nazron ke ye andaz-e-nazar hain 'muztar'

har nazar mein ye payamat kahan the pahle