sarab-e-dasht-e-tamanna mein din to Dhalta hai

sarāb-e-dasht-e-tamannā meñ din to Dhaltā hai

magar pahāḌ sā ik dard kab pighaltā hai

jo harf-e-haq kī sadā ko buland kartā hai

sitam-gar us ko sar-e-rah-guzar kuchaltā hai

darūn-e-zāt kī gahrā.iyoñ meñ jhāñkūñ to

zarā sī chaap ubhartī hai dil dahaltā hai

vo ek ḳhvāb ki tā'bīr jis kī mumkin thī

mirī girift se qatra-numā phisaltā hai

kisī kī aañkh ke goshe meñ ik sitāre sā

koī to ashk-e-girāñ-bār sā machaltā hai

girā huā hai mirā sā.ebān-e-jāñ lekin

tire gumān ke saa.e meñ ye sañbhaltā hai

siyāh raat kā aaseb yuuñ utartā hai

ki apne jabḌe meñ saare diye nigaltā hai

musāfiroñ kī tarah ajnabī se rastoñ par

koī ḳhayāl tirā dar-ba-dar Tahaltā hai

fareb-e-vā’da-e-fardā ke jhūTe qissoñ se

ye tifl-e-dil mire yaaro kahāñ bahaltā hai

sarab-e-dasht-e-tamanna mein din to Dhalta hai

magar pahaD sa ek dard kab pighalta hai

jo harf-e-haq ki sada ko buland karta hai

sitam-gar us ko sar-e-rah-guzar kuchalta hai

darun-e-zat ki gahraiyon mein jhankun to

zara si chap ubharti hai dil dahalta hai

wo ek KHwab ki ta'bir jis ki mumkin thi

meri girift se qatra-numa phisalta hai

kisi ki aankh ke goshe mein ek sitare sa

koi to ashk-e-giran-bar sa machalta hai

gira hua hai mera saeban-e-jaan lekin

tere guman ke sae mein ye sanbhalta hai

siyah raat ka aaseb yun utarta hai

ki apne jabDe mein sare diye nigalta hai

musafiron ki tarah ajnabi se raston par

koi KHayal tera dar-ba-dar Tahalta hai

fareb-e-wa’da-e-farda ke jhuTe qisson se

ye tifl-e-dil mere yaro kahan bahalta hai