phir maujzan hue hain samundar sarab mein

phir maujzan hue haiñ samundar sarāb meñ

ab saa.e ko talāsh karo āftāb meñ

āñkheñ khulīñ to jaag uThīñ hasrateñ tamām

us ko bhī kho diyā jise paayā thā ḳhvāb meñ

maiñ ne kiye the dasht-e-talab se ka.ī savāl

apnī sadā hī lauT ke aa.ī javāb meñ

baaqī varaq kitāb ke saada haiñ sab ke sab

sab kuchh likhā huā hai tamannā ke baab meñ

dariyā-e-dil se mujh ko ta'alluq hai is qadar

tinkā huuñ aur tiir rahā huuñ sharāb meñ

biite dinoñ kī yaad mire āñsuoñ meñ hai

yā'nī chamak rahe haiñ sitāre sahāb meñ

maiñ reza reza ho ke abhī kyuuñ bikhar na jā.ūñ

mumkin hai phir havā na rahe pech-o-tāb meñ

jannat se kyuuñ zamīñ pe girāyā gayā thā maiñ

ab mere saath hai ye zamīñ bhī 'azāb meñ

vo kaun thā milā thā kahāñ yaad kuchh nahīñ

tasvīr us kī dekh rahā huuñ gulāb meñ

sab dam-ba-ḳhud haiñ kaun magar faisla kare

naġhma hai uñgliyoñ meñ ki tār-e-rabāb meñ

'shahzād' bastiyāñ to huiiñ kab se be-sadā

kuchh harf haiñ ki bol rahe haiñ kitāb meñ

phir maujzan hue hain samundar sarab mein

ab sae ko talash karo aaftab mein

aankhen khulin to jag uThin hasraten tamam

us ko bhi kho diya jise paya tha KHwab mein

main ne kiye the dasht-e-talab se kai sawal

apni sada hi lauT ke aai jawab mein

baqi waraq kitab ke sada hain sab ke sab

sab kuchh likha hua hai tamanna ke bab mein

dariya-e-dil se mujh ko ta'alluq hai is qadar

tinka hun aur tir raha hun sharab mein

bite dinon ki yaad mere aansuon mein hai

ya'ni chamak rahe hain sitare sahab mein

main reza reza ho ke abhi kyun bikhar na jaun

mumkin hai phir hawa na rahe pech-o-tab mein

jannat se kyun zamin pe giraya gaya tha main

ab mere sath hai ye zamin bhi 'azab mein

wo kaun tha mila tha kahan yaad kuchh nahin

taswir us ki dekh raha hun gulab mein

sab dam-ba-KHud hain kaun magar faisla kare

naghma hai ungliyon mein ki tar-e-rabab mein

'shahzad' bastiyan to huin kab se be-sada

kuchh harf hain ki bol rahe hain kitab mein