nikle hain dil KHaridne lal-o-guhar se aap

nikle haiñ dil ḳharīdne lā'l-o-guhar se aap

begāna kis qadar haiñ ḳhulūs-e-bashar se aap

hañste haiñ is liye mire hāl-e-tabāh par

vāqif nahīñ haiñ lazzat-e-dard-e-jigar se aap

mujh se na pūchhiye mirā afsāna-e-hayāt

ye raaz pūchh liije mirī chashm-e-tar se aap

āñkhoñ meñ barhamī hai tabassum laboñ pe hai

kitne diloñ ko luuT chuke is hunar se aap

maujoñ meñ baḌh rahī hai mirī kashtī-e-hayāt

sāhil pe chhup ke baiThe haiñ tūfāñ ke Dar se aap

manzil thī Thokaroñ meñ javāñ the jab hausle

ab thak ke baiTh jaate haiñ nām-e-safar se aap

tīra-shabī ke āḳhrī lamhāt haiñ qarīb

māyūs kyuuñ haiñ itne tulū'-e-sahar se aap

TuuTā huā jo dil hai to phūTā huā nasīb

pūchheñ na kuchh ma.āl-e-tamannā 'zafar' se aap

nikle hain dil KHaridne la'l-o-guhar se aap

begana kis qadar hain KHulus-e-bashar se aap

hanste hain is liye mere haal-e-tabah par

waqif nahin hain lazzat-e-dard-e-jigar se aap

mujh se na puchhiye mera afsana-e-hayat

ye raaz puchh lije meri chashm-e-tar se aap

aankhon mein barhami hai tabassum labon pe hai

kitne dilon ko luT chuke is hunar se aap

maujon mein baDh rahi hai meri kashti-e-hayat

sahil pe chhup ke baiThe hain tufan ke Dar se aap

manzil thi Thokaron mein jawan the jab hausle

ab thak ke baiTh jate hain nam-e-safar se aap

tira-shabi ke aaKHri lamhat hain qarib

mayus kyun hain itne tulu'-e-sahar se aap

TuTa hua jo dil hai to phuTa hua nasib

puchhen na kuchh maal-e-tamanna 'zafar' se aap