na-ashna-e-dard ko ramz-ashna karun

nā-āshnā-e-dard ko ramz-āshnā karūñ

vo be-vafā agar hai to maiñ kyuuñ jafā karūñ

qaaf

samjhe na merī baat to maiñ kushta-e-kalām

apne kahe pe aap hī nādim huā karūñ

ḳhushbū na ho to phuul kī rangat bhī hai ġhubār

dil hī na ho to maiñ ruḳh-e-zebā ko kyā karūñ

reg-e-ravāñ pe naqsh banāne se fā.eda

ḳhūn-e-jigar se harf-e-tamannā likhā karūñ

dil kā lahū bhī chehra-e-gul par bikher duuñ

mahbūba-e-bahār kā haq to adā karūñ

tū duur ho to maiñ rag-e-jāñ meñ sameT luuñ

tū paas ho to terī tamannā sivā karūñ

kaifiyyat-e-davām meñ guzre tamām 'umr

āñkheñ to band hoñ tirī bāteñ sunā karūñ

sūraj ko baḌh ke shīsha-e-mai meñ utaar luuñ

lo shaam ho ga.ī dar-e-mai-ḳhāna vā karūñ

hai zāt-o-kā.enāt kā rishta yahī 'jamīl'

bujh jā.ūñ din ke saath to har shab jalā karūñ

na-ashna-e-dard ko ramz-ashna karun

wo be-wafa agar hai to main kyun jafa karun

qaf

samjhe na meri baat to main kushta-e-kalam

apne kahe pe aap hi nadim hua karun

KHushbu na ho to phul ki rangat bhi hai ghubar

dil hi na ho to main ruKH-e-zeba ko kya karun

reg-e-rawan pe naqsh banane se faeda

KHun-e-jigar se harf-e-tamanna likha karun

dil ka lahu bhi chehra-e-gul par bikher dun

mahbuba-e-bahaar ka haq to ada karun

tu dur ho to main rag-e-jaan mein sameT lun

tu pas ho to teri tamanna siwa karun

kaifiyyat-e-dawam mein guzre tamam 'umr

aankhen to band hon teri baaten suna karun

suraj ko baDh ke shisha-e-mai mein utar lun

lo sham ho gai dar-e-mai-KHana wa karun

hai zat-o-kaenat ka rishta yahi 'jamil'

bujh jaun din ke sath to har shab jala karun