kaise mumkin hai tumhaare bin mera ye dil rahe

kaise mumkin hai tumhāre bin mirā ye dil rahe

soch āvāra rahe aur gum-shuda manzil rahe

aap kā sun kar masā.ib ḳhud gurezāñ ho ga.e

aap ke hote hue kaise koī mushkil rahe

phir tajallī ke liye maiñ muztarib hone lagā

jab tamannā maiñ ne kī hai tuur kyuuñ haa.il rahe

kuchh vahāñ par kaT rahe haiñ kuchh yahāñ par Dūbte

aisī hālat dekh kar kaise sukūñ se dil rahe

sharm aatī hai mujhe us muñh-zabānī 'ishq par

dil kī hālat jaan kar bhī jo sadā ġhāfil rahe

maiñ abhī tak jāgtā huuñ raat bhī sone lagī

raat bhī hairān hai ab kaise ye bismil rahe

guftugū yāroñ se ho aur chaa.e kā bhī daur ho

jannatoñ meñ bhī ḳhudāyā aisī ik mahfil rahe

vo madad ko aa.e na aa.e rasā.ī ho na ho

Dūbne vaale kī nazroñ meñ magar sāhil rahe

kaise mumkin hai tumhaare bin mera ye dil rahe

soch aawara rahe aur gum-shuda manzil rahe

aap ka sun kar masaib KHud gurezan ho gae

aap ke hote hue kaise koi mushkil rahe

phir tajalli ke liye main muztarib hone laga

jab tamanna main ne ki hai tur kyun hail rahe

kuchh wahan par kaT rahe hain kuchh yahan par Dubte

aisi haalat dekh kar kaise sukun se dil rahe

sharm aati hai mujhe us munh-zabani 'ishq par

dil ki haalat jaan kar bhi jo sada ghafil rahe

main abhi tak jagta hun raat bhi sone lagi

raat bhi hairan hai ab kaise ye bismil rahe

guftugu yaron se ho aur chae ka bhi daur ho

jannaton mein bhi KHudaya aisi ek mahfil rahe

wo madad ko aae na aae rasai ho na ho

Dubne wale ki nazron mein magar sahil rahe