jhanka meri palkon se to pathra ke gira hai

jhāñkā mirī palkoñ se to pathrā ke girā hai

ḳhuuñ ban ke jo sadiyoñ mirī rag rag meñ bahā hai

āvāz ne us kā kabhī ghūñghaT nahīñ kholā

yuuñ to vo azal se mire hoñToñ pe rahā hai

tū merā hai ai mere tarāshe hue patthar

ḳhud miT ke tujhe maiñ ne nayā ruup diyā hai

tārīk samundar kā vo baasī thā magar ab

palkoñ pe mirī aa ke mujhe ghuur rahā hai

tū aa ki sañvar jaa.e ye āseb-zada dil

is band havelī pe tirā naam likhā hai

ban jaate haiñ pal bhar meñ sadāoñ ke bhī paikar

maiñ ne ye kisī bāñsurī vaale se sunā hai

yādoñ ke hilore haiñ tamannāoñ kī peñgeñ

mela sā mire dil meñ sar-e-shām lagā hai

ai shab tū kisī sāñvle sūraj ko janam de

sadiyoñ se sulagtī huī dhartī kī sadā hai

alfāz ke is ā.ina-ḳhāne meñ 'rashīd' aaj

ḳhud apne hī me'yār kī suulī pe chaḌhā hai

jhanka meri palkon se to pathra ke gira hai

KHun ban ke jo sadiyon meri rag rag mein baha hai

aawaz ne us ka kabhi ghunghaT nahin khola

yun to wo azal se mere honTon pe raha hai

tu mera hai ai mere tarashe hue patthar

KHud miT ke tujhe main ne naya rup diya hai

tarik samundar ka wo basi tha magar ab

palkon pe meri aa ke mujhe ghur raha hai

tu aa ki sanwar jae ye aaseb-zada dil

is band haweli pe tera nam likha hai

ban jate hain pal bhar mein sadaon ke bhi paikar

main ne ye kisi bansuri wale se suna hai

yaadon ke hilore hain tamannaon ki pengen

mela sa mere dil mein sar-e-sham laga hai

ai shab tu kisi sanwle suraj ko janam de

sadiyon se sulagti hui dharti ki sada hai

alfaz ke is aaina-KHane mein 'rashid' aaj

KHud apne hi me'yar ki suli pe chaDha hai