jahan bhar ke liye iztirab dusre hain

jahān bhar ke liye iztirāb dūsre haiñ

hamārī zaat ke lekin 'azāb dūsre haiñ

ise nasīb kaheñ yā fishār-e-jabr ai dil

kamāl ham ko mile kām-yāb dūsre haiñ

ye zaḳhm-zār-e-tamannā hai yaañ qayām na kar

na chhū ke dekh inheñ ye gulāb dūsre haiñ

mujhe hayāt ne baḳhshī haiñ aur tā'bīreñ

maiñ kyā karūñ mirī āñkhoñ meñ ḳhvāb dūsre haiñ

hameñ jo miltī hai tā'līm vo hai aur hī kuchh

magar hayāt-e-'amal ke nisāb dūsre haiñ

mire shu'ūr mire fan kā qadr-dān hai tū

magar ye kyā ki tirā intiḳhāb dūsre haiñ

jahan bhar ke liye iztirab dusre hain

hamari zat ke lekin 'azab dusre hain

ise nasib kahen ya fishaar-e-jabr ai dil

kamal hum ko mile kaam-yab dusre hain

ye zaKHm-zar-e-tamanna hai yan qayam na kar

na chhu ke dekh inhen ye gulab dusre hain

mujhe hayat ne baKHshi hain aur ta'biren

main kya karun meri aankhon mein KHwab dusre hain

hamein jo milti hai ta'lim wo hai aur hi kuchh

magar hayat-e-'amal ke nisab dusre hain

mere shu'ur mere fan ka qadr-dan hai tu

magar ye kya ki tera intiKHab dusre hain