jaan-e-KHulus-o-ruh-e-tamanna kahen jise

jān-e-ḳhulūs-o-rūh-e-tamannā kaheñ jise

ham us ko DhūñDte haiñ ki apnā kaheñ jise

aksar milegī mahfil-e-sar-gashtagān-e-gul

us gosha-e-chaman meñ ki sahrā kaheñ jise

minjumla-e-hazār ġham-e-'ishq-o-roz-gār

vo ġham bhī hai ki sa’y-e-mudāvā kaheñ jise

in shārehīn-e-ġham ko bhalā ġham se kyā ġharaz

ik shuġhl hai ki ġham kā tamāshā kaheñ jise

is soz-o-karb-o-dard-o-tapish meñ nahīñ vo baat

kyā chiiz ho ki un kī tamannā kaheñ jise

afsos halqa-hā-e-ḳhirad meñ asiir hai

'ālī' ki ek qalb sarāpā kahīñ jise

jaan-e-KHulus-o-ruh-e-tamanna kahen jise

hum us ko DhunDte hain ki apna kahen jise

aksar milegi mahfil-e-sar-gashtagan-e-gul

us gosha-e-chaman mein ki sahra kahen jise

minjumla-e-hazar gham-e-'ishq-o-roz-gar

wo gham bhi hai ki sa’y-e-mudawa kahen jise

in shaarehin-e-gham ko bhala gham se kya gharaz

ek shughl hai ki gham ka tamasha kahen jise

is soz-o-karb-o-dard-o-tapish mein nahin wo baat

kya chiz ho ki un ki tamanna kahen jise

afsos halqa-ha-e-KHirad mein asir hai

'ali' ki ek qalb sarapa kahin jise