iztirab-e-dil-e-na-kaam se Dar jate hain

iztirāb-e-dil-e-nā-kām se Dar jaate haiñ

raat to duur hai ham shaam se Dar jaate haiñ

vo bhī din the ki hamīñ-ham the balā-noshoñ meñ

ab ye 'ālam hai ki do jaam se Dar jaate haiñ

dil meñ aatā to hai tajdīd-e-tamannā kā ḳhayāl

nā-gahāñ gardish-e-ayyām se Dar jaate haiñ

ham ko anjām kī talḳhī meñ maza miltā hai

log āġhāz meñ anjām se Dar jaate haiñ

ye hamīñ the ki niDar ho ke tirā naam liyā

aaj to log tire naam se Dar jaate haiñ

tuhmat-e-'ishq to me'rāj hai ham ko 'muztar'

hoñge vo aur jo ilzām se Dar jaate haiñ

iztirab-e-dil-e-na-kaam se Dar jate hain

raat to dur hai hum sham se Dar jate hain

wo bhi din the ki hamin-ham the bala-noshon mein

ab ye 'alam hai ki do jam se Dar jate hain

dil mein aata to hai tajdid-e-tamanna ka KHayal

na-gahan gardish-e-ayyam se Dar jate hain

hum ko anjam ki talKHi mein maza milta hai

log aaghaz mein anjam se Dar jate hain

ye hamin the ki niDar ho ke tera nam liya

aaj to log tere nam se Dar jate hain

tuhmat-e-'ishq to me'raj hai hum ko 'muztar'

honge wo aur jo ilzam se Dar jate hain