dekho na tamasha meri is dar-ba-dari ka

dekho na tamāshā mirī is dar-ba-darī kā

ye faiz-e-junūñ-ḳhez hai āshufta-sarī kā

ik zaḳhm-e-tamannā kī hai phir se mujhe ḳhvāhish

marhūn huā jab se tirī chāragarī kā

tujh se hī mire roza-e-ummīd kā iftār

tū āḳhrī luqma hai ta'ām-e-saharī kā

duzdīda-nigāhoñ se take hai tū musalsal

kyā ḳhuub hai andāz tirī be-ḳhabarī kā

jin ke liye ho 'ishq-o-havas ek barābar

hogā na 'ilāj us kī pareshāñ-nazarī kā

kyā dād-e-vafā dījiye kyuuñ 'ishq meñ mariye

kuchh kaam hai dāman meñ abhī baḳhiya-garī kā

maiñ aaj jo is tarh ġhazal likhne lagā huuñ

ye hukm-e-dil-āvez hai ḳhvāboñ kī parī kā

kyā 'uzr-e-sitam lā.eñge kal roz-e-qayāmat

hogā jo hisāb aap kī bedād-garī kā

ham jin ke sabab aaj yuuñ nākāra hue haiñ

tā'na vahī dete haiñ hameñ be-hunarī kā

ik ḳhadsha-e-dushnām-tarāzī sā hai varna

kuchh aisā burā kaam nahīñ nāma-barī kā

maiñ apne kisī dost ko kyā raaz batā.ūñ

har ek ko hai shauq mirī parda-darī kā

dekho na tamasha meri is dar-ba-dari ka

ye faiz-e-junun-KHez hai aashufta-sari ka

ek zaKHm-e-tamanna ki hai phir se mujhe KHwahish

marhun hua jab se teri chaaragari ka

tujh se hi mere roza-e-ummid ka iftar

tu aaKHri luqma hai ta'am-e-sahari ka

duzdida-nigahon se take hai tu musalsal

kya KHub hai andaz teri be-KHabari ka

jin ke liye ho 'ishq-o-hawas ek barabar

hoga na 'ilaj us ki pareshan-nazari ka

kya dad-e-wafa dijiye kyun 'ishq mein mariye

kuchh kaam hai daman mein abhi baKHiya-gari ka

main aaj jo is tarh ghazal likhne laga hun

ye hukm-e-dil-awez hai KHwabon ki pari ka

kya 'uzr-e-sitam laenge kal roz-e-qayamat

hoga jo hisab aap ki bedad-gari ka

hum jin ke sabab aaj yun nakara hue hain

ta'na wahi dete hain hamein be-hunari ka

ek KHadsha-e-dushnam-taraazi sa hai warna

kuchh aisa bura kaam nahin nama-bari ka

main apne kisi dost ko kya raaz bataun

har ek ko hai shauq meri parda-dari ka