chand nikla hai koi meri nazar to lao

chāñd niklā hai koī merī nazar to laao

koī aayā hai zarā 'umr-e-ḳhizar to laao

nikal ā.eñge vo ehsās kī āvāz pe bhī

nāla-e-nīm-shabī meñ vo asar to laao

sho'la-e-zaḳhm-e-tamannā abhī lau dene lage

rah gayā ho lahū kuchh dil meñ agar to laao

mushtarī-o-mah-o-mirrīḳh to kuchh duur nahīñ

rahravo 'azm-e-safar raḳht-e-safar to laao

nazar aa.egā rag-e-sang meñ husn-e-ruḳh-e-dost

pahle lekin hunar-e-ā.ina-gar to laao

zindagī husn-e-'adam hai ki 'adam husn-e-hayāt

sab samajh jāoge vo zarf-e-nazar to laao

kisī zanjīr kī jhankār bhī zindāñ meñ nahīñ

zaḳhm-e-dil ashk lahū dāġh-e-jigar to laao

chand nikla hai koi meri nazar to lao

koi aaya hai zara 'umr-e-KHizar to lao

nikal aaenge wo ehsas ki aawaz pe bhi

nala-e-nim-shabi mein wo asar to lao

sho'la-e-zaKHm-e-tamanna abhi lau dene lage

rah gaya ho lahu kuchh dil mein agar to lao

mushtari-o-mah-o-mirriKH to kuchh dur nahin

rahrawo 'azm-e-safar raKHt-e-safar to lao

nazar aaega rag-e-sang mein husn-e-ruKH-e-dost

pahle lekin hunar-e-aina-gar to lao

zindagi husn-e-'adam hai ki 'adam husn-e-hayat

sab samajh jaoge wo zarf-e-nazar to lao

kisi zanjir ki jhankar bhi zindan mein nahin

zaKHm-e-dil ashk lahu dagh-e-jigar to lao