adu ki samt se hum par jo tir mara gaya

'adū kī samt se ham par jo tiir maarā gayā

hamāre jazba-e-ulfat ko phir ubhārā gayā

hamāre zaḳhm-e-tamannā khile guloñ kī tarah

jo terā naam sar-e-bazm yuuñ pukārā gayā

vo jis kā saath akelā hameñ na chhoḌtā thā

hamārī ziist kā vo ḳhush-numā sahārā gayā

ġharīb shaḳhs kī ulfat amar huī āḳhir

shah-e-dayār-e-jafā taḳht se utārā gayā

kisī ko manzil-e-maqsūd ḳhud bulātī rahī

kisī ko raah kī tārīkiyoñ meñ maarā gayā

hamārī maañg na jaane yahāñ pe kaun bhare

kisī ke sāmne dāman agar pasārā gayā

kisī ko apnā banāne kī aarzū kyoñ ho

ki Duub apne muqaddar kā jab sitāra gayā

ye shā'irī to miyāñ ḳhūn-e-dil se phūTegī

lahū se qalb ke jazboñ ko gar sañvārā gayā

rah-e-hayāt se vābastagī to hai us kī

'ma'āz' lauT hī aa.egā gar pukārā gayā

'adu ki samt se hum par jo tir mara gaya

hamare jazba-e-ulfat ko phir ubhaara gaya

hamare zaKHm-e-tamanna khile gulon ki tarah

jo tera nam sar-e-bazm yun pukara gaya

wo jis ka sath akela hamein na chhoDta tha

hamari zist ka wo KHush-numa sahaara gaya

gharib shaKHs ki ulfat amar hui aaKHir

shah-e-dayar-e-jafa taKHt se utara gaya

kisi ko manzil-e-maqsud KHud bulati rahi

kisi ko rah ki tarikiyon mein mara gaya

hamari mang na jaane yahan pe kaun bhare

kisi ke samne daman agar pasara gaya

kisi ko apna banane ki aarzu kyon ho

ki Dub apne muqaddar ka jab sitara gaya

ye sha'iri to miyan KHun-e-dil se phuTegi

lahu se qalb ke jazbon ko gar sanwara gaya

rah-e-hayat se wabastagi to hai us ki

'ma'az' lauT hi aaega gar pukara gaya