رائیگاں ہو گیا تبسم بھی

رائیگاں ہو گیا تبسم بھی

دل کو تسکیں نہ دے سکے تم بھی

دل کی خاموش آرزو پہ نہ جا

دل میں ہیں سیکڑوں تلاطم بھی

اک تغافل سے اک توجہ تک

عشق آنسو بھی ہے تبسم بھی

رنگ رخ تو ہی اب فسانہ چھیڑ

ساتھ دیتا نہیں تکلم بھی

اللہ اللہ نزاکت غم عشق

بار ہوتا ہے اک تبسم بھی

جانے کیا کیا خیال آتے ہیں

یاد آتے نہیں ہو جب تم بھی

جام و مینا میں پھول کھلنے لگے

اڑ کے پہنچا کہاں تبسم بھی

تم سے امید پرسش غم تھی

مسکرا کر گزر گئے تم بھی

کس کو دیکھا ہے آج اے اقبالؔ

دھندلے دھندلے ہیں ماہ و انجم بھی