dil pe zaKHm khate hain jaan se guzarte hain

dil pe zaḳhm khāte haiñ jaan se guzarte haiñ

jurm sirf itnā hai un ko pyaar karte haiñ

vo jo pher kar nazreñ paas se guzarte haiñ

ai ġham-e-zamāna ham tujh ko yaad karte haiñ

vo dayār-e-jānāñ ho yā javār-e-mai-ḳhāna

gardisheñ Thahartī haiñ ham jahāñ Thaharte haiñ

e'tibār baḌhtā hai aur bhī mohabbat kā

jab vo ajnabī ban kar paas se guzarte haiñ

mauj-e-ḳhūñ hai āñkhoñ meñ paaoñ meñ haiñ zanjīreñ

yuuñ bhī un kī yādoñ ke silsile ubharte haiñ

un kī anjuman bhī hai daar bhī rasan bhī hai

dekhnā hai dīvāne ab kahāñ Thaharte haiñ

un ke ik taġhāful se TūTte haiñ dil kitne

un kī ik tavajjoh se kitne zaḳhm bharte haiñ

jo pale haiñ zulmat meñ kyā sahar ko pahchāneñ

tīrgī ke shaidā.ī raushnī se Darte haiñ

chhāñv kab mayassar hai zindagī ke sahrā meñ

qāfile mohabbat ke dhuup meñ Thaharte haiñ

laakh vo gurezāñ hoñ laakh dushman-e-jāñ hoñ

dil ko kyā kareñ 'iqbāl' ham unhīñ pe marte haiñ

dil pe zaKHm khate hain jaan se guzarte hain

jurm sirf itna hai un ko pyar karte hain

wo jo pher kar nazren pas se guzarte hain

ai gham-e-zamana hum tujh ko yaad karte hain

wo dayar-e-jaanan ho ya jawar-e-mai-KHana

gardishen Thaharti hain hum jahan Thaharte hain

e'tibar baDhta hai aur bhi mohabbat ka

jab wo ajnabi ban kar pas se guzarte hain

mauj-e-KHun hai aankhon mein paon mein hain zanjiren

yun bhi un ki yaadon ke silsile ubharte hain

un ki anjuman bhi hai dar bhi rasan bhi hai

dekhna hai diwane ab kahan Thaharte hain

un ke ek taghaful se TuTte hain dil kitne

un ki ek tawajjoh se kitne zaKHm bharte hain

jo pale hain zulmat mein kya sahar ko pahchanen

tirgi ke shaidai raushni se Darte hain

chhanw kab mayassar hai zindagi ke sahra mein

qafile mohabbat ke dhup mein Thaharte hain

lakh wo gurezan hon lakh dushman-e-jaan hon

dil ko kya karen 'iqbaal' hum unhin pe marte hain