bhagti hi ja rahi hai be-KHabar hai zindagi

bhāgtī hī jā rahī hai be-ḳhabar hai zindagī

haiñ bahut armān lekin muḳhtasar hai zindagī

rāste anjān haiñ tanhā safar hai zindagī

is haqīqat se magar ab bā-ḳhabar hai zindagī

paas hai manzil mirī ab tak usī ġhaflat meñ thā

bas isī kāran huī ye dar-ba-dar hai zindagī

duur tak phailā huā hai sirf kaalā sā dhuāñ

aag siine meñ liye soz-e-jigar hai zindagī

'ishq ne badlī hai duniyā dil mire tū bhī badal

saath ab to kitnī dil-kash rah-guzar hai zindagī

'umr ke is moḌ par bhī DhūñDhtā huuñ maiñ use

mil na paayā jo charāġh-e-rah-guzar hai zindagī

qatl vo kartī rahī hai muskurā kar hī 'amar'

kyuuñ use tū keh rahā hai ham-safar hai zindagī

bhagti hi ja rahi hai be-KHabar hai zindagi

hain bahut arman lekin muKHtasar hai zindagi

raste anjaan hain tanha safar hai zindagi

is haqiqat se magar ab ba-KHabar hai zindagi

pas hai manzil meri ab tak usi ghaflat mein tha

bas isi karan hui ye dar-ba-dar hai zindagi

dur tak phaila hua hai sirf kala sa dhuan

aag sine mein liye soz-e-jigar hai zindagi

'ishq ne badli hai duniya dil mere tu bhi badal

sath ab to kitni dil-kash rah-guzar hai zindagi

'umr ke is moD par bhi DhunDhta hun main use

mil na paya jo charagh-e-rah-guzar hai zindagi

qatl wo karti rahi hai muskura kar hi 'amar'

kyun use tu keh raha hai ham-safar hai zindagi