sard raaton ki rida Dubti nindon ki thakan

sard rātoñ kī ridā Dūbtī nīñdoñ kī thakan

chehra-e-sub.h se TuuTī mire ḳhvāboñ kī thakan

aañkh meñ pighle hue sāñvle chehroñ kī namī

dhyān meñ gūñjtī ḳhāmosh sadāoñ kī thakan

ek saayā bhī na ubhrā mirī galiyoñ ke qarīb

rāste khā ga.e pathrā.ī nigāhoñ kī thakan

shal hue jaate haiñ har peḌ ke sūkhe baazū

Dhal ga.ī zard ḳhizāoñ meñ bahāroñ kī thakan

baaġh meñ phailtī tanhā.ī ke bojhal paaoñ

girte pattoñ kī thakan garm dopahroñ kī thakan

dil pe ik baar sā ḳhāmosh tamannāoñ kī dhuul

hoñT par jamtī huī an-kahī bātoñ kī thakan

yaad ke dasht meñ sahme hue aahū kī tarah

ghūmtī phirtī rahī hai mirī sochoñ kī thakan

ik tire jism kī saj-dhaj meñ simaT aa.ī hai

josh-e-taḳhlīq se ghabrā.e ḳhudāoñ kī thakan

aañkh meñ aate zamānoñ ke ḳhalāoñ kā sukūt

zehn meñ biitī huī hāñptī sadiyoñ kī thakan

mere ā'māl meñ chīḳhe hai badī kī vahshat

merī nīyat meñ hai nā-karda gunāhoñ kī thakan

vaqt kā bojh liye phirtā rahā huuñ 'sarmad'

jism se lipTī hai dam toḌte lamhoñ kī thakan

sard raaton ki rida Dubti nindon ki thakan

chehra-e-subh se TuTi mere KHwabon ki thakan

aankh mein pighle hue sanwle chehron ki nami

dhyan mein gunjti KHamosh sadaon ki thakan

ek saya bhi na ubhra meri galiyon ke qarib

raste kha gae pathrai nigahon ki thakan

shal hue jate hain har peD ke sukhe bazu

Dhal gai zard KHizaon mein bahaaron ki thakan

bagh mein phailti tanhai ke bojhal paon

girte patton ki thakan garm dopahron ki thakan

dil pe ek bar sa KHamosh tamannaon ki dhul

honT par jamti hui an-kahi baaton ki thakan

yaad ke dasht mein sahme hue aahu ki tarah

ghumti phirti rahi hai meri sochon ki thakan

ek tere jism ki saj-dhaj mein simaT aai hai

josh-e-taKHliq se ghabrae KHudaon ki thakan

aankh mein aate zamanon ke KHalaon ka sukut

zehn mein biti hui hanpti sadiyon ki thakan

mere aa'mal mein chiKHe hai badi ki wahshat

meri niyat mein hai na-karda gunahon ki thakan

waqt ka bojh liye phirta raha hun 'sarmad'

jism se lipTi hai dam toDte lamhon ki thakan