salib-e-shab se koi subh jab utare mujhe

salīb-e-shab se koī sub.h jab utāre mujhe

ye ehtimāl nahīñ hai ki tū pukāre mujhe

'ajīb karb kī ḳhairāt baañT jaate haiñ

udaas phuul tujhe Dūbte sitāre mujhe

maiñ ḳhaak thā to tire saath uḌ bhī letā thā

jo ab havā huuñ koī kis tarah bahā.e mujhe

mujhe batā use dushman kahūñ ki dost kahūñ

jo merā ġham bhī kare nazr bhī guzāre mujhe

kabhī to tū bhī mire ḳhuun kī shahādat de

ki tere naam pe kis kis ne tiir maare mujhe

shab-e-firāq jo aa.e to dil ye chāhtā hai

koī sitāra hī kartā rahe ishāre mujhe

gajar ke saath nigār-e-vatan pukārtī hai

koī banā.e mujhe aur koī sañvāre mujhe

salib-e-shab se koi subh jab utare mujhe

ye ehtimal nahin hai ki tu pukare mujhe

'ajib karb ki KHairaat banT jate hain

udas phul tujhe Dubte sitare mujhe

main KHak tha to tere sath uD bhi leta tha

jo ab hawa hun koi kis tarah bahae mujhe

mujhe bata use dushman kahun ki dost kahun

jo mera gham bhi kare nazr bhi guzare mujhe

kabhi to tu bhi mere KHun ki shahadat de

ki tere nam pe kis kis ne tir mare mujhe

shab-e-firaq jo aae to dil ye chahta hai

koi sitara hi karta rahe ishaare mujhe

gajar ke sath nigar-e-watan pukarti hai

koi banae mujhe aur koi sanware mujhe