kaun kahta hai ki mazi ke parastar hain hum

kaun kahtā hai ki maazī ke parastār haiñ ham

ik na.ī sub.h-e-daraḳhshāñ ke talabgār haiñ ham

aaj har-chand ki rusvā sar-e-bāzār haiñ ham

phir bhī ai jān-e-suḳhan hāsil-e-guftār haiñ ham

ek lamha bhī nahīñ jin kā jafā se ḳhālī

vo bhī kis shaan se kahte haiñ vafā-dār haiñ ham

kal kā sūraj hameñ paiġhām-e-masarrat degā

aaj maanā ki masā.ib meñ giraftār haiñ ham

ab to aatā bhī nahīñ husn ke jalvoñ kā ḳhayāl

is tarah gesu-e-daurāñ meñ giraftār haiñ ham

ham se phailā hai zamāne meñ ujālā ai 'nūr'

zulmat-e-shab ke liye matla'-e-anvār haiñ ham

kaun kahta hai ki mazi ke parastar hain hum

ek nai subh-e-daraKHshan ke talabgar hain hum

aaj har-chand ki ruswa sar-e-bazar hain hum

phir bhi ai jaan-e-suKHan hasil-e-guftar hain hum

ek lamha bhi nahin jin ka jafa se KHali

wo bhi kis shan se kahte hain wafa-dar hain hum

kal ka suraj hamein paigham-e-masarrat dega

aaj mana ki masaib mein giraftar hain hum

ab to aata bhi nahin husn ke jalwon ka KHayal

is tarah gesu-e-dauran mein giraftar hain hum

hum se phaila hai zamane mein ujala ai 'nur'

zulmat-e-shab ke liye matla'-e-anwar hain hum