aankh mein tufan pairon mein bhanwar le jaega

aañkh meñ tūfān pairoñ meñ bhañvar le jā.egā

haq hathelī par sajā.e apnā sar le jā.egā

bādaloñ kī fauj sūraj ko bujhā saktī nahīñ

chhīn kar koī falak se kab sahar le jā.egā

sub.h hogī ḳhvāb āñkhoñ meñ liye niklegā vo

shaam hogī phir vo apnī laash ghar le jā.egā

tuḳhm-rezī apnī fitrat hai lagā.eñge samar

jānte haiñ dūsrā koī samar le jā.egā

ek dahshat ek vahshat ek vīrānī sahī

ham to jā.eñge udhar hī dil jidhar le jā.egā

vo havā-e-tund hai kuchh bhī na chhoḌegā 'alī'

phuul se ḳhush-bū du'āoñ se asar le jā.egā

aankh mein tufan pairon mein bhanwar le jaega

haq hatheli par sajae apna sar le jaega

baadalon ki fauj suraj ko bujha sakti nahin

chhin kar koi falak se kab sahar le jaega

subh hogi KHwab aankhon mein liye niklega wo

sham hogi phir wo apni lash ghar le jaega

tuKHm-rezi apni fitrat hai lagaenge samar

jaante hain dusra koi samar le jaega

ek dahshat ek wahshat ek virani sahi

hum to jaenge udhar hi dil jidhar le jaega

wo hawa-e-tund hai kuchh bhi na chhoDega 'ali'

phul se KHush-bu du'aon se asar le jaega